[198] EPISTOLA XCVIII.

Praestantissimo Viro

HENRICO GERDOU.

Lubecam.

Ad literas tuas, Vir Praestantissime, quas mihi Ornatissimus juvenis D. IANUS ALBIUS huc reversus XXIV. Iulii Stylo novo attulit finaliter ac paucis respondeo, quod velim boni consulas, me ante duodecim annos adfini tuo IANO Lubecensi Castigationes meas ita uti tunc erant tradidisse, ut ipse eas absolveret propterea, quod mihi per occupationes, ut ipse id facerem non vacarer. Itaque cum interim mihi aggravata sit aetas, auctae etiam occupationes, & mutata professio, multo minus etiam nunc vacat, easdem Castigationes accessione operae IANI auctas absolvere & edere. Quocirca si me insuper cautione astringam ad efficiendum id, quod vos cupitis, & operi immoriar ita, ut IANUS est immortuus, quod fieri posse nemo negat, quid aliud egero quam ut haeredes meos obligem vobis ad praestandos fructus ex laboribus meis, quibus ad ipsos neque gratia neque honor ullus redundare queat? Quocirca ne tu cum cohaeredibus tuis habeas, quod de me conqueraris, equidem te remitto ad literas meas, quas idem IANUS tibi superioris Aprilis XVIII. hic scriptas attulit, ita ut si conditiones illae tibi placent, quas ibi proposui, possis me faciendum exspectare quod promisi, sin minus possis alium quaerere, qui defectum suppleat in Collectaneis, quae reliquit IANUS, ne conqueraris me tibi fuisse impedimento, quo minus lucrum consequaris, quod spectas. Ego de his, quae fine controversia mea sunt agam pro arbitrio meo, quod suadebit occasio. Vale, & caetera pete ex meis ad Cl. Virum D. AUGUSTINUM KOCKERTUM datis. Coloniae prid. Calend. Aug. Anno MDXCV.

SUFFRIDUS PETRUS

Leovardiensis, U. I. C. Historicus Frisiae, Canonicus ad SS. Apostolos.